「可唔可以問你借兩個口罩？」一位住喺我附近嘅朋友打嚟。
我：「借口罩？」
「我意思係買，買兩個畀我吖。」
我：「唔係唔係，我唔介意畀你，唔使畀錢我，過嚟拎啦！你呢一刻有冇口罩？一係我拎過嚟。」
「呢一刻有，不過我阿媽今晚返工可能唔夠口罩，擔心佢冇得用。」
佢媽咪做保安，所屬公司喺每個崗位都放咗一盒口罩畀員工，用完就要拎返個空盒去換一盒新嘅，但係近呢幾日，佢媽咪一返工打開個櫃桶，幾廿個口罩都係畀人拎晒，問過上一更同事，對方唔認有攞多，後來知道公司裡面其他保安都遇到相同問題，而公司方面就話之你，見啲口罩用得咁快，索性以後每個保安返工時一係自備，一係就去control room拎一個。
其實12個鐘頭嘅工作，每人每日只限分發一個口罩，保護程度絕對唔理想，何況保安要不斷接觸好多人，咁樣真係好唔掂，據悉佢媽咪公司已經陸續有保安員因為咁而辭職。
疫症當前，仲有人妄顧同事安全，拎走晒啲口罩，公司又唔處理好，聽到都好嬲，但係更唏噓嘅係同朋友之間嘅對話：
「對唔住呀，因為要做嘢真係排唔到口罩，已經上網訂咗，但要月中先到貨，你自己夠唔夠用㗎？唔使畀4個咁多喎，2個得啦，我聽日再諗辦法。」
我：「Ok嘅，畀埋呢4個你，我仲夠用到上飛機去台灣。」
星斗市民要為口罩去通宵排隊同張羅，真係十分之荒謬，電視正直播林鄭嘅記招，一啲實質嘢都冇講到出嚟，記者提到封關兩隻字，佢繼續耍太極遊花園，有個咁嘅特首同埋政府，香港人真係好可憐。
雖然係新年流流，但我真係忍唔住想問一句：「林鄭你個畜牲幾時死呀？」
Search